- فى وجهة نظر البعض وأنا لست منهم طبعاً , أن بنت اليوم قبل الزواج : بيضاء حسناء جذابة رقيقة , وبعد الزواج سمراء قبحاء نفراء خنشورة.
- رجل بلا أطفال وبعد زواج دام أكثر 30 عاماً , ولكى ينسى أنه كهل بلا أهل فقد قرر منذ زمن أن ينسى أنه متزوج أصلاً , وجاءت زوجته يوماً تسأله : ممكن أسافر بكره شرم مع بنت خالتى؟ , فرد والدهشة تملكه: وبتسألينى ليه ماتروحى تسألى جوزك!!!
- الخنقة فمصر تنحصر فى يوم حر قوى , ومواصلات زحمة طحن , وشوارع كلها فحت , وزوجة تسألك عن الفلوس على طول.
- فى أوساطنا الشرقية كل الناس خطائين , ومش بس خطائين دى غلطاتهم فضايح , والنكتة إن أى واحد منهم يغلط أو يتصرف غلط يبقى كأنه كفر , ويظهر ده خصوصاً فى تصرفات الخير بالذات.
- أحلى ما فى الأطفال ذوى عمر الشهور إنهم صرحاء الى أبعد الحدود , ودى الحاجة اللى بقينا معدومين منها , فتلاقى لو واحد ماعجبوش بيعيط فى وشه ولو إستلطفه بيبتسمله , ولما يلاقيه ممل بيدور وشه الناحية التانية , ولو إتخنق منه أوى تلاقيه عمال يقول أصوات غريبة مش مفهومة طبعاً بس على العموم هو شوية غلط على تحبيشة شتايم دليل إنه إتخنق أوى.
- سألوه عن زوجته قال لهم زى الخاتم فى صباعى , وسألوها عن زوجها قالت زى الجزمة فى رجلى , شوفتوا فروق التشبيه.
- الزوج طول عمره غلبان من أول مايتجوز وهو عمال حاضر حاضر ودايما مغلوب على أمره , ويجى الواد يركب على ضهره ويقوله حا يا حمار , ورئيسه فالشغل على طول يبهدله ومراته فالبيت على طول مربياله الخفيف ودايما بيبهدل نفسه فى مواصلات عشان يوفر للواد اللى فضل أيام وشهور مايبنمش بسببه , وغيره كتييييييير , آه وفى الآخر راحوا يقفوا جنب اللى مسمين نفسهم - عرضا-ً الجنس الناعم.
- وجاء من جديد ذلك اليوم الذى تنقلب فيه كل أحلامك إلى كوابيس مفزعة , وجاءت تلك اللحظة التى تقوم فيها فجأة وقد وقد ملكك الأرق وكل ماتحاول تصرف الكابوس ده وتوزعه تلاقيه للطارشة مصدرلك كإنه جمل وبرك.
- إذا نظرت هى إليك بادئة بإبتسامة فهى معجبة بك , وإذا بادرت هى بالكلام فهى أيقنت أن إبتسامتها لا تفيد معك ولا تكاد تصبر حتى تبدأ أنت بالحديث , وإذا حدث أن قالت لك فى أول مرة معجبة بك وأحبك فهى واقعة أوى , وإذا تكلمتما سوياً وأخذت تسألك عن عائلتك كلها فهى بترسم على جواز.
- يسألك ذلك السؤال الصعب مرة أخرى , من أنت؟ , وللمرة المليون لا تعرف الإجابة وتسرح فى خيالك بحثاً عن إجابة مقنعة وتحتار وتكاد تحترق غيظاً من عجزك عن إجابة سؤال من خمسة أحرف , لماذا كل هذه الصعوبة لماذا لا تعرف من أنت لماذا تحتال على نفسك بالخطأ وتقتنع به , هل تنتظر اليوم الذى يجئ فيه الناس إليك مشيرين إليك قائلين إنه أنت من أبدع , وهل تظن نفسك حقاً مبدعاً كفاية أم أنه خيالك الواسع بلا نهاية , وهل تظن إنك قد تكف عن الضحك على نفسك حتى لا يضحك الناس عليك يوماً ما, هيهات عبثاُ تحاول فى نفس كاذبة ليس لها دواء ولا وصفة , لا تضيع وقتك بالتهيؤات وحاول على الأقل أن تجيب على هذا السؤال بصدق حتى لو مع نفسك فقط.