التاج الجميل ده وصلي من قريبى العزيز أحمد المصرى وأشكره عليه , وكان التاج فيه الآتى
قالوا لك اختار عصر من عصور علشان تعيش فيه تختار أى عصر وفى عهد أى حاكم .. واشمعنى ؟
كان نفسى ومنى قلبى إنى أكون موجود فى عهد الرسول (صلى الله عليه وسلم) ولكن قدر الله وماشاء فعل , وأنا راضى , وإيشمعنى؟ ده سؤال مش محتاج الإجابة عليه
------------
أول أولوية فى حياتك عيلتك ولا شغلك ولا اصحابك ؟
أقول على السؤال ده عيلتى , وده لأن لسه ماشتغلتش , وأكيد مفيش حد عاقل هايفضل صحاب على الأهل , ده يبقى لأمؤخذة0000
-------------
ايه أكتر حاجة بتحبها فى رمضان ؟
عليقة النور اللى بتتعلق فى الشارع وتنوره زيادة , ومرواح الناس أكثر للجوامع والمساجد , وبعض الناس اللى بيمنعوا نفسهم من الشتايم والغلط عمال على بطال فالمواصلات بس عشان صايمين , قال صايمين قال
--------------
أوصف أجمل فطار ممكن تفطره ؟
لما حصل مرة فى ذات الخيال وأنا بحلم لاقيت عيلتى كلها كلها بتفطر عندنا فالبيت , صراحة ده شئ فرحنى بس للأسف لسه ماتحققش
---------------
لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟
العدل صفة آلهيه وانا بشر مهما كان برضه قليل الحيلة, وفى أيامنا هذه بالذات ظهرت أوى كلمة : لا إنى أعترض , وعشان كده أنا بعيد عن حكم أى حد , عشان كده كده أى حد بيتحكم فالناس فى بلدنا دايما بيظلمهم أو على الأقل مابيعرفش يحقق مايطلق عليه عدل الرحمة بين البشر0
-----------------
ايه اللى بيبوظ الحكام ..نفسهم ؟ ولا الشعب ؟ ولا الحاشية المقربة ؟
عادة بيبقوا الحاشية , لأنهم هم اللى بيبوظوا البلد ويجى الحاكم يشوف البلد يقوموا فاتحين له شباك خاص فيه البلد جنة مليانة سعادة وحب - ويمكن يكون الشباك الحقيقى للبلد فيه البلد بتتحرق ومفيش حد طايق أخوه , ويفضلوا وراه لحد مايتإلش ويجى اللى بعده لا يطلع ناصح ويبألشهم لا يسبهم هم يشألطوه0
-----------------
لو ممكن تشتغل شغلانة تانية كنت تتمنى تبقى ايه ؟؟
انا عن نفسى مابشتغلش أصلا - بس أحب ان شاء الله أشتغل فى مجال فن السينما(النظيفة)0
-------------------
ايه تانى بلد تتمنى تعيش فيها بعد مصر ؟؟
السعودية , ويمكن ساعتها هالبد فالحرم
-------------------
اوصف ترتيبات اجمل فرح ممكن تحضره ؟
الافراح فى مصر ماشية على رتم واحد وممل وغير متغير , يعنى لو واحد حصل معاه انه راح عشر افراح فى شهر واحد - وربنا يكتر أفراحنا وافراحكوا - بعيد عنكوا هايكره عيشته وهايحلف ميت صرمة قديمة ماهو رايح افراح تانى , يااااه فين أفراح بره , تصدقوا انهم بيجيبوا متعهد أو متخصص فالافراح عشان يفكر ويفتكس ازاى يعملهم أفكار جديدة تتعمل فى فرحهم عشان يبقى مختلف - ناس بيتحب التغيير مش زيينا عاملين زى المثل اللى بيقول : بابو محمدين جاتلك العروسة , فقال يلا أهو كله ستات!!!
-------------------
بتراعى كلام الناس والقيل والقال ؟؟ ولو اه او لا قول ليه ؟
بيعجبنى فالمجتمعات الغربية إن كل بنى آدم فى حاله وبس , مالوش دعوة فلان عمل ايه وعلان سوى ايه , إنما هنا بقى ييييييييي , الواحد بيحس بالنقص لو عدى عليه يومين من غير مايغلط فى حد أو من غير مايوبخه ويتريأ عليه , وكأنه هو معصوم وكل اللى بيعمله صح ,وعن نفسى ساعات براعيه لأنى مش مستنى إن واحد 00000 يقول عليا نص كلمة0
--------------------
صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
زاجل؟؟؟؟ حصنة؟؟؟؟ نعم؟؟؟؟؟ شوف هو إحتمال يجيلى حالة من الممل بطول طوووول الوقت الممل بطبيعته وهنام تانى0
------------------
السعادة هى ..؟
أن أرى دائما من حولى سعيدون من أجلى ويكنون لى ولو مثقال ذرة من حب0
----------------
عندك أمل ؟ اسبابك ؟
أمل؟ لأ عندى سعاد ,,,, شوف الأمل دايما موجود مادام إبن آدم عايش عالأرض , ويمكن لأن الواحد حصله نوع من الإحباط بسبب البلد دى , بس دايما الواحد بيضحك على نفسه إن دايما البلد دى فى أمل فيها إنها تتغير
-------------------
لما بتحب تهرب من كل شئ بتروح فين ؟؟
ساعات بروح مكان واسع مفيهوش حد غيرى أقعد أفكر فى كل حاجة وعن كل شئ , ولو حتى مابلقيش المكان ده بغمض عينى وأتخيله وأعيش فيه ,عشان لما بهرب من كل حاجة ومن كل الناس بتتبقى حاجة واحدة لازم أقعد معاها ماينفعش أهرب منها , هى نفسى
-------------------
امتى اول مرة خدت فيها نفس طويل وقلت ياااه انا فعلا كبرت؟
نفس طويل إزاى وأنا عمرى مالمست الشيشة , وكبرت أزاى , ده انا يادوب مكمل عقدين من ......بس
-------------------
اما بتعمل عمل خير بيكون ايه هو دافعك الاول ؟
حسنات تتحط فى حقيبة حسناتى لا أدرى إن كانت مليئة أم يسكنها الهواء
-------------------
بتشرب سجاير ؟؟ وايه شعورك اما ست او راجل بيشرب سجاير ؟ ليه؟
أنا الحمد لله مابشربش , وكمان ايه يعنى لما الستات يشربوا سجاير ما هما بيشربوا سجاير من أيام الهكسوس , بس هو حتى لدول ولا لدول الغلط واحد ولو تعددت الصور
-----------------
بتعرف ايدك اليمين من الشمال ازاى ؟؟
أنا عارف إيدى اليمين من الشمال من أيام ما كنت فى أولى حضانة , وكمان عشان أنا بكتب بالشمال , وكمان فى حاجة إسمها ساعة , واللى مايعرفش بعد كده يبقى سورى0
--------------------
ايه اكتر الة موسيقية بتحبها ؟
هما كذا واحدة يعنى بحب الطبلة والجيتار والهارمونيكا والفلوت , ده غير المقطوعات الموسيقية الجامدة قوى0
---------------------
فى رأيك ليه الذوق والنخوة اتعدموا ؟
عشان فيه الأجيال اللى فاتوا لسه بيعلموا ولادهم كلمتين عن الحياة فى بلادنا , الدنيا صعبة لازم تبقى وحش البرارى أسد جسور وصقر كبير ولايهمك حد ولا تخاف على مصلحة حد غير نفسك وبس عشان تعيش فيها ولازم تكون عايش عشان نفسك وبس , محدش هاينفعك ومحدش بيساعد حد , لازم تعتمد على نفسك وتتحرق الدنيا بعد كده ولا يهمك, وعشان كل ده يحصل لازم تبقى أخلاقك زبالة وكبريائك فالأرض0
---------------------
ايه الحاجة اللى لو حصلت لك حتبقى سعيد اوى ؟
يبتسم لى قدرى من تانى وألاقى توأم روحى جيالى
---------------------
تحب يبقى عندك ارض زراعية ولااجنس عربيات ولاكام عمارة ولافلوس فى البنك؟
أحب أكون راضى عن حالى ومفيش فى جيبى مليم حرام وكله بعد كده هايبقى مش فارق حاجة بالنسبة لى
------------------
البحر ولا النيل ؟
نيل ؟ الملوث ده , النيل اللى لو عطست هلاقى نفسى عديت الناحية التانية , البحر طبعا , أحلى إحساس إنك تقف على سطح عمارة صف أول بتطل عالبحر فالدور 15 مثلا وتفتح درعاتك وتسيب هوا البحر يعيش جواك وتحسسه إنك قادر تعديه وتروح لبلاد العالم مهما كبر عليك0
-----------------
مركب ولا طيارة ؟
الأتنين كويسين يعنى عادى , مفيش واحدة مابتغلطش , الطيارة بتقع والمركب بتغرق
-----------------
مجنون ولا عاقل ؟
زمان كان كلمة مجنون دى شتيمة , بس دلوقتى بعض الشباب بيفخروا بيها , وبينى وبينكم أنا نوعا ما واحد منهم,,,,,,, نوعا ما هاه
-----------------
تقرا كتاب ولا تتفرج عليه فيلم ؟
فيلم لو جامد وكتاب لو مفيد أوى0
-----------------
أكتر كاتب بتحترمه في مصر؟
أنيس منصور
تمرر التاج ده لمين ؟
للدمونين كلهم طبعا , للى ماخدهوش , أخص بالذكر
الستة بتوع صيدلة
مريمDAYLIGHT
مسلمة-طي النسيان
طنطاوي-مصرنا
محمد مفيد-في الصميم
عيون ضيقة
واحدة من الناس-همسات دافئة
نور-ظل قلم......بس!!0
أتمنى لكم التوفيق والنجاح من كل قلبى
تحياتى لكم جميعاً
